SU NURAGOS ARDAULESU
Inu, dispenseri de allerghia,
chistiu dae Tziscu Ejana in cantina,
in su cupone hat fattu maia
e s’est cumpostu in sa mesina
de su nuragos, in monte Ulare,
Frantziscu e fizu tenet cura,
cando est cottu, a innennare,
disponen zente cun premura
armados de serros e pischedha
ispozan su fundu de irde seda,
ischeran aniga bianca e niedha,
prenen de oghes adhes e campeda
sa ide accorrant a duos a duos,
su fruttu sanu collint a isportas,
lassant’in terra pibiones cruos
e fozas siccas, che mariposas mortas
juntos a domo benin catzigaos
a macchinariu, in s’apposentu,
sos urdones de Bacco, indorados,
maltrattaos chentza sentimentu
a da chi mustu essid’a cannedhu,
riverentes sighin su cerimoniale
zente esperta e carchi giovanedhu
adorande su donu celestiale
de mustu craru sa cuba est prena ,
croccolande sa cantzone sua
udhit e cantat de bona lena
e ammadurat, su sutzu de sa ua
cantada a s’inzatteri fidele
cun faedhos chi dhi essin dae coro
su licore, pigulosu che mele
e solianu, in color’e oro
sighinde a gradu custas tappas
diventat nettare maduru,
a tzertos istringhet sas iscrapas,
calecunu che dhu croccat puru
de basca e de frittu poderoru
in magasinu enit difesu
in s’ampulla finit su reposu
su nuragos ARDAULESU
Su bintiduos de triulas de su Duamilasette
Antonianzelu Sanna de Ilartzi
Nessun commento:
Posta un commento