In magasinu (de Fellicu Cossu)

In magasinu
(assazande su ‘inu nou)

(de Fellicu Cossu)

Est mesu trulu? De malu sabore?
In binza non b’hapo nudda barbera,
solu muristellu e nieddera;
e che ‘inzateri non so a primore

Zertu binu no est pro su rettore
ma est fattu a s’antiga manera,
si puru non leat pannu in fiera
costad’est pelea e salidu suore.

Occannu tenidemi finzas dolu
si produidu hapo custu ‘pastone’,
in sa faina sò abbèru noizolu.

E buffade si non bos costat pena
ca si ch’imparo sa professione
fatto cuncurrenzia a Oliena.




Sa die de Santa Caderina 1990